बजेट निकासा नहुंदा पशु विकास कार्यक्रम प्रभावित

नेपालगन्ज, ५ असार ः जिल्ला पशु सेवा कार्यालय बांकेको सामूदायिक पशु विकास आयोजनाको तृतिय चौमाशिक बजेट निकासा नहुंदा पशु विकासको काम प्रभावित भएको छ ।
बांके जिल्लामा सञ्चालित सामुदायिक पशु विकास आयोजनाको करिव १५ लाख रुपैया रकम चैत महिनामा निकासा भईसक्नुपर्ने भएपनि असार लागिसक्दा समेत निकासा हुन सकेको छैन ।
चार- चार महिनामा अर्थ मन्त्रालयबाट निकासा हुनु पर्ने उक्त रकम अहिलेसम्म निकासा नभएपछि लक्ष्य अनुसार पशु विकास कार्यक्रम हुन सकेको छैन ।
समयमा रकम निकासा नहुंदा बाके जिल्लामा सञ्चालित सामुदायिक पशु विकास कार्यक्रम अन्तर्गत प्राविधिक सहयोग,औषधी उपचार,प्रचार प्रसार, पशु कृत्रिम गर्भपतन, नियमित खोप लगायतका काम प्रभावित भएको पशु सेवा कार्यालयका पशु चिकित्सक जनकराम भण्डारीले बताएका छन् ।
उनले रकम निकासाको लागि सम्बन्धित निकायलाई अनुरोध गरिएको पनि जनाए ।
समयमा बजेट प्राप्त नभएपछि विभिन्न कार्यक्रम अलपत्र परेकोले पुन सुचारु गर्न समस्या हुने देखिएको छ ।