लागु औषध विरुद्ध विद्यार्थी सडकमा

नेपालगन्ज, २ चैत्र । लागु औषध विरुद्धको अभियानमा आज नेपालन्जमा १० हजार बढी विद्यार्थीहरु सडकमा उत्रेका छन् । लागु औषध विरुद्ध वृहत र्यालीको आयोजना गरेर सडकमा उत्रेका विद्यार्थीहरुले लागु औषध विरुद्ध नारा लगाई आ आफ्नो एक्यबद्धता व्यक्त गरेका थिए । जिल्ला प्रहरी कार्यालय, बाँकेका प्रहरी प्रमुख प्रहरी उपरिक्षक विक्रम सिंह थापाको अगुवाईमा आयोजना गरिएको र्याली स्थानीय त्रिभुवन चौकमा जम्मा भई नेपालगन्ज नगरको विभिन्न भागको परिक्रमा गरि पुष्पलाल चौकमा पुगि कोणसभामा परिणत भएको थियो ।

हाम्रो चाहना, धुम्रपान र लागु औषध रहित समाजको श्रृजना भन्ने मूल नाराका आयोजना गरिएको र्यालीमा जिल्ला प्रहरी कार्यालय बाँके, प्याब्सन बाँके, एन प्याब्सन बाँके, शिक्षक यूनियन, गणतान्त्रिक शैक्षिक मञ्च, जिल्ला शिक्षा कार्यालय बाँकेलगायतको समेत सहभागिता रहेको थियो । कोणसभालाई सम्बोधन गर्दै बाँके प्रहरी वरिष्ठ उपरिक्षक माधव प्रसाद नेपालले कुनै पनि विकृति विसंगति हल गर्नको लागि एक्लो प्रशासनले मात्र गर्न नसक्ने हुँदा पुलिस पब्लिक पाटर्नसिपको अवधारणा लागु गरि जनता, विद्यार्थी, अभिभावन, नागरिक समाज सबै मिलि अघि बढ्नु पर्नेमा जोड दिनुभयो । बाँके जिल्लालाई लागु औषध रहितको जिल्ला बनाउन सबैको सहयोग आवश्यक भएकोमा जोड दिदै प्रहरी वरिष्ठ उपरिक्षक नेपालले यस अभियानलाई प्रतिफल दिनका लागि विद्यार्थी, प्रहरी र अभिभावकले आजदेखि अभियानको थालनी गरेको बताउनुभयो । कार्यक्रममा बाँके जिल्ला प्रमुख ढुण्डीराज पोख्रेल, बाँके प्रहरी उपरिक्षक विक्रम सिंह थापा, जिल्ला शिक्षा कार्यालय बाँके प्रमुख भक्त बहादुर ढकाल, प्याबसन बाँके अध्यक्ष जगत कुमार खत्री, धम्बोझी उमाविका पाचार्य किरण आचार्यलगायतले बोल्नु भएको थियो ।