नेपालगन्ज, ६ असार ः भेरी अञ्चल अस्पतालले आमा सुरक्षा कार्यक्रम अन्तर्गत आव ०६६/०६७ को बैशाख महिनासम्म २७ सय १७ जना आमालाई निःशुल्क प्रसुती सेवा प्रदान गरेको बताएको छ ।
नेपाल सरकारले गर्भवती महिलाको लागि ल्याएको विशेष कार्यक्रम अन्तर्गतको आमा सुरक्षा कार्यक्रममा गर्भवती महिलाले सुत्केरी हुंदाको समयमा लाग्ने सम्पूर्ण खर्च निःशुल्क गरेपछि सो सेवा निःशुल्क प्रदान गरेको बताएको हो ।
नेपाल सरकारले सुत्केरी हुंदा लाग्ने बेडचार्ज, ब्लड, अप्रेसन, मेडिसिनलगायत सम्पूर्ण खर्च सुत्केरी हुन आउने आमालाई निःशुल्क दिने गरेको र घर र्फकदा यातायात वापत रु ५ सय समेत दिने गरेको छ ।
आईतवार भेरी अञ्चल अस्पतालले आयोजना गरेको आमा सुरक्षा कार्यक्रमको सामाजिक लेखा परिक्षण कार्यक्रममा अस्पतालले दिने निःशुल्क सेवाहरुको बारेमा साथै अस्पतालले आमा सुरक्षा कार्यक्रम अन्तर्गत गरेको क्रियाकलापहरुको बारेमा जानकारी गराएको थियो ।
आमा सुरक्षा कार्यक्रमका लागि आव ०६६/०६७ मा आएको कुल १ करोड ५ लाख ७४ हजार रकम मध्ये स्वास्थ्य संस्थामा ६६ लाख ९५ हजार ५ सय र आमाहरुको लागि १३ लाख ३९ हजार रकम खर्च भईसकेको जनाएको छ ।
भेरी अञ्चल अस्पतालका प्रमुख विमल ढकालले नेपाल सरकारले गर्भवती महिलाले ४ पटकसम्म नियमित चेक जांच गराएवापत रु ४ सय उपलब्ध गराउने नियम बनाएपनि अझै सम्म सो रकम वितरण गर्ने वातावरण नमिलाएको बताए । कार्यक्रममा सहभागीहरुले यस क्षेत्रका दुर्गम गाविसबाट सुत्केरी हुन आउने आमाहरुलाई नेपाल सरकारले दिने रु ५ सय भत्ता अपुग भएको हुंदा त्यसलाई बढाउनुपर्ने सुझाव दिएका थिए ।
No comments:
Post a Comment