ज्ञानेन्द्र आज नेपालगन्ज आउंदै

नेपालगन्ज, ९ जेठ ः पूर्व राजा ज्ञानेन्द्र शाह आज नेपालगञ्ज आउने भएका छन् । नेपालगञ्जमा रहेको प्रसिद्ध बागेश्वरी मन्दिरको दर्शन र पूजा अर्चनाका लागि बुद्ध एयरको नियमित उडानबाट पूर्व राजा नेपालगञ्ज आउन लागेका हुन् । ज्ञानेन्द्रकोे भ्रमणको व्यवस्था मिलाउन उनका स्वकिय सचिव सागर तिमिल्सेना दुई दिन अघि नै नेपालगञ्ज आई पुगेका छन् । बहिर्गमनपछि पहिलो पटक नेपालगञ्ज आउन लागेका पूर्व राजा ज्ञानेन्द्रको स्वागतका लागी राप्रपा नेपाल, विभिन्न धार्मिक संस्थाहरु र राजावादीहरु आवश्यक तयारीमा जुटेको राप्रपा नेपालका केन्दि्रय सदस्य हिक्मत ढकालले जानकारी दिए । पूर्व राजाको स्वागतको लागि अहिले नेपालगंजको त्रिभुवन चोक र नेपालगंज वरिपरि नेपालगंज नगरपालिकाले सरसफाई र दमकलद्धारा पानीले सफा गरिरहेको छ । पूर्व राजा एयरपोर्टदेखि सिधै त्रिभुवन चोकमा आई त्यहांबाट पैदल यात्रा गरि बागेश्वरी मन्दिर दर्शन गर्ने बताइएको छ ।
पूर्व राजा शाहका लागि नेपालगन्ज स्थित स्नेह होटलको सबैभन्दा महंगो कोठा बुक गरिएको छ । केहि समयको आरामपछि पूर्व राजा आज नै काठमाडौं र्फकने निजि सचिव तिमिल्सिनाले बताए ।