शान्ति र संविधान निर्माणका लागि शान्ति पदयात्रा

नेपालगंज, २६ बैशाख ः "शान्ति र संविधान निर्माणका लागि नागरिक पदयात्रा" भन्ने मूल नाराका साथ आईतबार नेपालगन्जका कानुन व्यवसायीहरुले कानुन दिवस मनाएका छन् ।

यस अवसरमा नेपाली जनताले चांडै शान्तिको अनुभुति गर्न पाओस भन्दै शान्ति पदयात्रा निकालिएको थियो । बांके जिल्ला अदालत बार एशोसिएसन, पुनरावेदन अदालत बार एशोसिएसन र शान्ति र लोकतन्त्रका लागि पेशागत संगठन -पापड) को संयुक्त आयोजनामा निकालिएको शान्ति पत्रयात्रा हस्पिटल चोकदेखी शुरु भई नगरको विभिन्न भागको परिक्रमा गरि पुनरावेदन अदालतमा पुगि कोणसभामा परिणत भएको थियो ।
शान्ति पदयात्रामा सहभागी कानुनव्यवसायी, पेशागत संघ संस्थाका प्रतिनिधि, पत्रकार, मानवअधिकारकर्मीले संवैधानिक सर्वोच्चता कायम गर, शासन व्यक्तिको होइन, विधिको हुनुपर्छ, दण्डहिनताको अन्त्य गरौं, संबैधानिक सर्वोच्चता कायम गरौं, सम्पूर्ण राजनीतिक दलहरुले वृहत शान्ति सम्झौताको पालना गरलगायतका नारा लेखिएको प्लेकार्ड छातीमा टांसेका थिए ।

पद यात्रापछि भएको कोणसभामा बोल्दै नेपाल बार एशोसिएसनका पूर्व केन्दि्रय उपाध्यक्ष प्रल्हादबहादुर कार्कीले वर्तमानको अवस्थामा शान्ति र संविधान निर्माण गर्ने समय भएको हुंदा राजनैतिक दलहरु आपसी मतभेदमा नअल्झी सहमती र सहकार्य मार्फत देश र जनतालाई शान्तिपूर्ण निकास दिनु पर्नेमा जोड दिनु भएको थियो । त्यसैगरी नेपाल पत्रकार महासंघ, बांकेका अध्यक्ष झलक गरैले शान्ति र लोकतन्त्रको लागि पत्रकार महासंघ सधैं खबरदारी गर्दै आईरहेको बताउनु भयो । नेपालगंज उद्योग बाणिज्य संघका अध्यक्ष सुनिल कुमार शर्माले ०६३/०६३ को जनआन्दोलन मार्फत प्राप्त लोकतन्त्रलाई ल्याउनमा कानुन व्यसायीहरुले ठूलो भुमिका खेलेको उल्लेख गर्दै देशमा शान्ति र संविधान निर्माण गराउन पनि कानुन व्यवसायीको महत्वपूर्ण भुमिका हुनुपर्नेमा जोड दिनु भएको थियो ।

कार्यक्रममा पिस फर नेपालका अध्यक्ष डा. सुशिल कोईराला, प्राध्यापक संघका अर्जुन पोखे्रल, नेपाल शिक्षक युनियनका अध्यक्ष बलराम यादव, नेपालगन्ज उद्योग बाणिज्य संघका पूर्व केन्दि्रय सदस्य अच्युत पसाई, मानवअधिकार संगठनका गणेश कुमार रेग्मी, नेपाल बार काउन्सीलका केन्दि्रय पार्षद अब्दुल अजिज मुस्लमान, एमनेष्टीका यशोदा कुमारी उपाध्याय, पेशागत महासंघका डम्मरराज सुवेदी लगायतले शान्ति र लोकतन्त्रका लागि अब नागरिक समाजले पहरेदारी गर्नुपर्ने र दबाब मुलक कार्यक्रम मार्फत राजनीतिक दलहरुलाई देश र जनताप्रति जिम्मेवार गराउन पहल गर्नु पर्नेमा जोड दिएका थिए । कोण सभापछि चांडै देशमा शान्ति होस् भन्ने कामना गर्दै सहभागीहरुले दिप प्रज्वलन पनि गरेको थिए ।