काङ्ग्रेसको नेतृत्वमा सरकार गठनका लागि चाडै प्रक्रिया सुरु हुने

नेपालगन्ज, ३० फागुन । नेपाली काङ्ग्रेसका महामन्त्री प्रकाशमान सिंहले काङ्ग्रेसको नेतृत्वमा सरकार गठनका लागि बुधबारबाट प्रक्रिया सुरु हुने बताउनुभएको छ । जाजरकोटमा मंगलबार विहान पत्रकारहरुसँग महामन्त्री सिंहले यस्तो बताउनु भएको हो । काङ्ग्रेस क्षेत्र नम्बर १ जाजरकोटको आयोजनामा सदरमुकाम खलंगामा हुन लागेको आमसभालाई सम्बोधन गर्न सिंह जाजरकोट पुग्नु भएको हो । महामन्त्री सिंहले अब बन्ने राष्ट्रिय सहमतिको सरकारको नेतृत्व काङ्ग्रेसले गर्ने र त्यही सरकारले शान्ति र संविधानका बाँकी काम पूरा गर्ने विश्वास दिलाउनुभयो । जेठ १४ पछि कुनै पनि हालतमा संविधानसभाको म्याद थप्ने पक्षमा काङ्ग्रेस नरहेको स्पष्ट पार्दै महामन्त्री सिंहले तोकिएकै समयसीमाभित्र संविधान निर्माण गर्नुको विकल्प नभएको बताउनुभयो ।