आफ्ना नेता नहुंदा राहत पनि पाइएन

सुर्खेत, १४ असार ः आफ्नो पक्षमा बोलिदिने कुनै नेता कार्यकर्ता नभएको, फरक राजनीतिक आस्था भएका कारण सुर्खेतमा सशस्त्र द्वन्द्वबाट प्रभावित परिवारहरु अझै राहतबाट बञ्चित भएको पाइएको छ । करिव दुई महिनाको अवधिमा सशस्त्र द्वन्द्वबाट प्रभावितहरुको तथ्यांक लिने क्रममा इन्सेक सुर्खेतले सो कुराको खुलासा गरेको हो ।
सोमवार सुर्खेतमा द्वन्द्वपीडितहरुको पाश्र्वचित्र पूर्व समीक्षा कार्यक्रमको आयोजना गरी इन्सेक सुर्खेतका प्रतिनिधि दुर्गा थापाले आफ्ना नेताहरु नहुंदा करिव एक दर्जन पीडितहरुले राहत पाउन नसकेको बताए । उनले जिल्लाका ४८ वटा गाविसहरुबाट सो तथ्यांक लिएका थिए ।
सशस्त्र द्वन्द्वमा राज्य तथा तत्कालीन विद्रोही पक्षबाट के कतिको मृत्यु भयो, कुन हालतमा छन्, घाइतेको अवस्था कस्तो छ र राहतका वारेमा तथ्यांक लिन गत भदौ र असोज महिनामा गाविस दौडाहा गरेको जानकारी दिदैं सो क्रममा दल निकट नहुंदा, आफ्ना नेता नहुंदा राहत पाउन नसकेका परिवारहरु पत्ता लागेको थापाले बताए ।
तर दलहरुले भने छिटफुट रुपमा कोही राहतबाट छुटेपनि धेरैले पाएको जनाएका छन् । नेकपा एमाले सुर्खेतका अध्यक्ष नवराज रावतले नेता कार्यकर्ताको पहुंच पुगेकाले छिटै राहत पाउने तर पहुंच नभएकाले ढिलो पाउने गरेको पाइएको बताउछन् । एउटै घटनामा परेका केहीले पाउने र कोहीले नपाउने गरेको पाइएपनि प्रक्रियाबाट अघि बढाउंदा केही ढिलो हुनसक्ने उनको भनाइ छ ।
स्थानीय शान्ति समितिमा द्वन्द्वपीडितहरुको करिव दुई हजार ५०० निवेदन परेका छन् । छानविन गर्ने क्रममा केही ढिलो भएपनि बास्तविक पीडितहरुलाई भने राहतको सिफारिस गरिएको समितिले जनाएको छ । अहिलेसम्म करिव दुई सय ५० जना भन्दा बढीले सरकारबाट पाउने एक लाख राहत पाइसकेको जिल्ला प्रशासन कार्यालयले जनाएको छ ।
सुर्खेतमा जिल्लामा २०५२ देखि २०६३ सम्मको सशस्त्र द्वन्द्वका क्रममा दुई सय ८६ जनाको हत्या भएको तथ्यांक सार्वजनिक गरिएको छ । राज्यपक्षबाट एक सय ६३, विद्रोही पक्षबाट एक सय १६ र दोहोरी भिडन्त तथा बम विष्फोटमा परी सात जनाको मृत्यु भएको इन्सेक सुर्खेतले जनाएको छ ।
त्यस्तै राज्यपक्षबाट ११ र विद्रोही पक्षबाट तीन जना बेपत्ता भएको, अंगभंगमा राज्य पक्षबाट ८७ जना र विद्रोही पक्षबाट ७५ जना भएको पनि जनाइएको छ । यसैगरी दुई सय ६१ जना माओवादी जनसेना र चार सय ६२ जना सर्वसाधारण घाइते भएको इन्सेकको तथ्यांकमा छ ।
माओवादी जनसेनाको घाइतेहरुको संख्यामा सुर्खेतस्थित माओवादी जनसेनाको छैठौं डिभिजनले असुन्तष्टी जनाउंदै घाइतेको संख्या अझ थप हुने जनाएको छ । डिभिजनका पूर्ण झरना स्मृति विग्रेडका कमाण्डर सौगात आरसीले इन्सकेको तथ्यांकमा दुई सय ६१ जना मात्रै घाइते भएको तथ्यांकप्रति असहमति जनाउंदै संख्या धेरै भएको बताए ।
सुर्खेतमा रहेको माओवादी जनसेनाको तीन सहायक र एक शिविरमा गम्भीर घाइते जनसेनाको संख्या मात्रै ७०० भन्दा बढी रहेको जानकारी उनले दिए । केही बाहेक लगभग सवै जनसेना घाइते भएको दावी गर्दै उनले इन्सेकको तथ्यांकलाई पुनः परीक्षण गरेर एकीन संख्या तोकिने विग्रेड कमाण्डर आरसीले बताए ।
दलका नेताहरुले भने इन्सेकको तथ्यांकप्रति सहमति रहेको बताए । एमाले सुर्खेतका अध्यक्ष नवराज रावत, कांग्रेसका डण्ड ढकाल, राप्रपा नेपालका अमृत रानालगायतले प्रस्तुत तथ्यांकप्रति सहमति रहेका जनाएका छन ।